Música en directo e imaxe dialogan neste espectáculo, idea orixinal da Mostra I. de Cinema Etnográfico MICE do Museo do Pobo Galego, para pór en valor o papel das cantareiras. A orixe da proposta son as fotografías, as gravacións sonoras orixinais, as partituras e os textos froito da investigación de Dorothé Schubarth (coa colaboración de Antón Santamarina), que conforma o Cancioneiro Popular Galego.
Richi Casás lidera a parte musical desta obra na que conflúen pandeiretas, jazz e ritmos latinos e que toma como punto de partida os cantos recollidos pola súa avoa Rosa. As voces orixinais mestúranse maxistralmente coa interpretación contemporánea.
