A partir de catro bailaríns e dous músicos en directo iníciase un diálogo entre a música, o canto e a danza tradicional coa danza contemporánea, no que se reflexiona sobre a relación das novas xeracións co folclore. Esta coreografía é unha viaxe que honra o pasado, vive o presente e busca e abraza o futuro, unha dualidade entre o permanente e o transitorio.
O bailarín e coreógrafo Daniel Rodríguez presenta o seu novo traballo en Carballo, no que aposta por unha creación multisensorial onde corpo, música e tecnoloxía se entrelazan para construír un contexto único.
